Сэтинньи ый 4 күнүгэр ,,Сомоҕолоһуу,, бырааһынньыгынан эҕэрдэлээн туран нэһилиэкпит олохтоохторугар, ыалдьыттарыгар Анемподист Софронов — Алампа айымньытынан «Таптал» драматическай испиктээкили көрдөрдүбүт. Бу күн заалга толору көрөөччү кэлэн артыыстар олус үөрэн, долгуйан оонньоотулар. Испиктээкили көрө кэллилэр ыҥырыылаах ыалдьыттарбыт Мэҥэ-Хаҥалас улууһун культуура салалтатын Профсоюзтарын бэрэссэдээтэлэ Эмма Максимовна Павлова, Мэҥэ-Хаҥалас улууһун культуура салалтатын начальнигын солбуйааччыта Александр Сергеевич Кулешов, культуура салалтатын сүрүннүүр исписсэлииһэ Наталия Гаврильевна Пахомова ону тэҥэ быйылгы «Олоҥхо батл» муҥутуур кыайыылааҕа Станислав Александрович Иванов уонна субу курдук санааларын суруйан ыыттылар:
,,Сомоҕолоһуу,, күнүгэр кулууп үлэһиттэрэ нэһилиэктэригэр бэлэх🎭 ууннулар
Ол курдук, Тыыллыма нэһилиэгин олохтоохторугар бүгүн кулууп үлэһиттэрэ дьоһун бэлэх оҥордулар. Анемподист Иванович Софронов — Алампа,, Таптал,, драматын толору оонньоон быйылгы сезону арыйа, сүрэхтии көрдөрдүлэр.
Спектакль саҕаланыыта олохтоох дьон аргыый мустан, көрөр саала туолан, эбии ыскамыайка ылан оҕолор олордулар. Бары киирэн бүппүттэрин кэннэ туруорааччы режиссер Виталий Никифоров биир дойдулаахтарын эҕэрдэлээн, махтанан тыл эттэ, драманы билиһиннэрээт барыларын көрөргө ыҥырда. Көрөөччү залын уота умулунна уонна ураты дьиктини кэтэспиттии саала иһэ иһийдэ. Чочумча чуумпу сатыылаабытын кэннэ быыс арыллан толору декорациялаах, оччотооҕу былыргы үйэ дьиэтэ — уота көстөн Кэтириис кыыс талкынан тирии имитэ олороро, кини аас-туор,, имиллибит,, олоҕо арыллан, оонньонон барда.
Спектакль саҕаланыаҕыттан бүтүөр диэри режиссер араас музыканан киэргэтиилэр киирбиттэрэ , балаҕан быыһа хас турук ахсын уларыйыыта, суруйааччы санаатын кыргыттар — уолаттар саҥаларынан таба туттан тириэрдэрэ, ону бүтүннүү ситимнээн киллэрбитэ спектакль ис хоһоонун дириҥник арыйда. Туруорааччы көрөөччүгэ бу айымньынан ыарахан олохтоох эдэркээн кыыс дьылҕатын быстыытын толкуйдатар араас хартыыналары арыйбыта олус биһирэнэр. Бэйэм курдук көрөччүлэр сирэйдэрэ-харахтара сырдаан, ботур-ботур кэпсэтэн, саҥа спектакльтан дуоһуйуу ылбыттара көстөр. Ити аата спектакль көрөөччүгэ биһирэннэ, үрдүк таһымҥа ааста. Этиэххэ баҕарыллар, Аркадий Алексеев аатынан култуура киинэ сыл ахсын биир дойдулаахтарыгар анаан араас спектаклары туруораллар эбит, ол курдук Николай Неустроев,,Тиэтэйбит,,комедията, Алампа,, Куоратчыт,, Тимофей Сметанин,, Лоокуут уонна Ньургуһун,, драматын -бу улахан үлэ, дьоһун бэлэх. Ол иһин сыл ахсын көрөөччү күүтэр, долгуйа кэтэһэр эбит. Кэрэни айар, дьонугар театр алыптаах эйгэтин сырдатар, кынаттыыр Аркадий Алексеев аатынан култуура киинин бары үлэһиттэригэр айымньылаах үлэни, чэгиэн –чэбдик буолууну олох-дьаһах үтүөтүн, сыралаах үлэлэригэр ситимнээх ситиһиилэри баҕарабын!
Наталия Пахомова
Сэтинньи 4 күнэ, 2023 сыл. .
