Сэтинньи ый 17-с күнүгэр Арчы балаҕаныгар «Итэҕэл» түмсүү, А.М.Алексеев аатынан култуура дьиэтин үлэһиттэрин кытары С.З.Борисов аатынан Тыыллыма орто оскуолатын Банчина Лариса Афанасьевна салайааччылаах 12 саастаах оҕолоругар уонна кинилэр төрөппүттэригэр, «Сайдамҥа киллэрии» туомун ыытта.
Тэрээһин Мария Васильевна көмүлүөккэ уот оттон Аал уотун иччитин мааллаан, ыйдааҕы алгыһынан аста. Оскуола эйгэтигэр 47-с сылын үлэлии сылдьар, 2007 сылтан «Сыл төгүрүк эргиирэ» инновационнай программаны үлэлэтэн кэлбит, элбэх оскуолаҕа уоппутун тарҕаппыт Евдокия Павловна киһи эрэ өйүгэр хатанар гына ыйдар сахалыы тутулларын, туох өйдөбүллээхтэрин, оҕолор сахалыы ааттара ким диэн буолуохтааҕын, инники профессиялара ханнык хайысханы тутуһуохтарын сөбүн сиһилии кэпсээтэ, оҕолорго бэйэни ииттинэллэригэр сөптөөх истин ис хоһоонноох эҕэрдэ суруктар туттарылыннылар. Оҕолор да төрөппүттэр да олус сэргээтилэр.
Оскуолаҕа организаторынан үлэлиир Дарья Васильевна оҕолор болҕомтолоругар, сахалыы сөпкө саҥаралларыгар анаан оонньуулары оонньотто.
Төрөппүттэр саха аһын астаан аҕалан остуолга тарпыттарын бэрт минньигэстик үөрэ-көтө кэпсэтэ, кэпсэтэ аһаатылар. Көмүлүөк оһох оттуллан, мас таһыргыыр тыаһа уонна оҕолор төрөппүттэриниин сахалыы таҥас таҥнан кэлбиттэрэ тэрээһини ситэри сахалыы тыыннаата. Сайдамы — үтүөнү өйдүүр дьоҕуру — киллэрии туома быйылгы үлэбит аанын арыйда.
Билиһиннэрдим Итэҕэл түмсүү чилиэнэ Прокопьева М.В.
