«КУЙУУР ОЛОҤХОТО-2024″ олоҥхону толорор ыччаттарга күрэх ыытыллан ааста!
Кулун тутар 30-31 күннэригэр 1 Тыыллыма нэһилиэгэр биир дойдулаахпыт М.К.Аммосов аатынан ХИФУ профессора, тыл билимин хандьыдаата Галина Семеновна Попова-Санаайа бырайыагынан , «Куйуур олоҥхото-2024» номнуо онус сылын ыытылынна. Кулун тутар 30 күнүгэр «Куйуур олоҥхотун» үөрүүлээх аһыллыытыгар алгыс сиэрин-туомун ыччат олоҥхону толорооччу, сүрүн тэрийээччи Виталий Никифоров түһэрдэ, Виталий Никифоров, Аргунова Марианна Петровна үөрэтэр, олоҥхоҕо уһуйар «Сарыал» оҕолор олоҥхону толорооччуларын бөлөхтөрө Н.И.Степанов-Ноорой «Күн Эрили» олоҥхотун толорбуттарын астына иһиттибит, олус сэргээтибит. Кэлбит ыалдьыттары, кыттааччылары 1 Тыыллыма нэһилиэгин баһылыга Руслан Васильевич Афанасьев, СР Олоҥхо Ассоциациятын президенэ Февронья Васильевна Шишигина, Г.Г. Колесов аатынан Олоҥхо Дьиэтин салайааччыта Евдокия Николаевна Иванова эҕэрдэлээтилэр. Күн иккис аҥарыгар «Санаайа саһарҕалаах санаалара» дьиэ кэргэн, оҕо саас сылларынан оҕону иитиигэ олоҥхо оруолун тула аһаҕас кэпсэтии өрө күүрүүлээхтик барда, кыттааччы ыччаттар, олохтоохтор бука бары санааларын сайа этиннилэр, мөккүһүү да баар буолла, кыайтарбат кыһалҕалары быһаарарга сүбэлэстилэр, бары да уран тыллаах-өстөөх ыччаттар мустубут буолан этэн-тыынан элбэх саҥа толкуйдары үөскэттилэр. Аһаҕас кэпсэтии кэннэ олоҥхону оллоонноон олорон истии буолла, дьүүллүүр сүбэҕэ үлэлээтилэр:
-Бырайыак ааптара, М.К.Аммосов аатынан ХИФУ профессора Галина Семеновна Попова-Санаайа;
-СР Олоҥхо Ассоциациятын президенэ Февронья Васильевна Шишигина;
-Гавриил Колесов аатынан Олоҥхо Дьиэтин салайааччыта Евдокия Николаевна Иванова;
-СР Олоҥхо киинин сүрүннүүр үлэһитэ Ульяна Михайловна Флегонтова;
-1Тыыллыма нэһилиэгин элбэх хайысхалаах сынньалаҥ киинин уус-уран салайааччыта, тэрийээччи Виталий Витальевич Никифоров.
«Куйуур олоҥхото» күрэх иккис күнүгэр кулун тутар 31 күнүгэр үгэс быһыытынан бука бары Лүкээрики эбэҕэ киирэн көмүс хатырыктааҕы үөрэ-көтө куйуурдаатыбыт. Быйылгы Куйуур олоҥхотугар бары 12 олоҥхону толорооччу ыччаттар:
-Мира Егорова, Бөтүҥ, Амма улууһа;
-Сайыына Шамаева, Тааһаҕар, Бүлүү улууһа;
-Айта Васильева, Аллараа Бэстээх, Мэҥэ Хаҥалас улууһа;
-Прасковья Лебедева, Покровскай куорат, Хаҥалас улууһа;
-Нарыйаана Шамаева, Тааһаҕар, Бүлүү улууһа;
-Гаврил Менкяров, Дьокуускай куорат;
-Анатолий Захаров, Чурапчы;
-Арчыман Номоҕон, Ытык күөл, Таатта улууһа,
-Егор Никифоров, Бөтүҥ, Амма улууһа;
-Зинаида Бураева, Амма;
-Марфа Аммосова, Дьанхаады, Мэҥэ-Хаҥалас улууһа кытыннылар.
Быйылгы күөн-күрэххэ бары да ааттаах-суоллаах, улахан күрэхтэр кылаан кыайыылаахтара илин-кэлин түсүһэн сүрдээх тыҥааһыннаах олоҥхону толоруу буолла, түмүккэ:
-«Кэскиллээх олоҥхоһут” анал аат саамай эдэр кыттааччы Нарыйаана Шамаева, Тааһаҕар, Бүлүү уонна 1Тыыллыма нэһилиэгин Аркадий Алексеев аатынан культура дьиэтин анал бирииһин ылла;
-«Түөлбэ олоҥхотун утумнааччы» анал аат Егор Никифоров, Бөтүҥ, Амма улууһа уонна 1 Тыыллыма нэһилиэгин олохтоох дьаһалтатын анал бирииһин ылла, баһылык Руслан Васильевич Афанасьев;
-«Удьуор утумун тутар олоҥхоһут» анал аат Сайыына Шамаева, Тааһаҕар, Бүлүү, уонна 1 Тыыллыма нэһилиэгин «Улуу Тоҕой» түмсүү, «Күнчээн» оҕо уһуйаанын, салайааччы: Дайбаннырова Надежда Владимировна анал бириистэрин ылла;
-«Хомоҕой тыллаах олоҥхоһут» Анатолий Захаров, Чурапчы уонна Мария, Станислав Ивановтар, С.З.Борисов аатынан 1Тыыллыма орто оскуолатын салайааччы: Константин Анатольевич Захаров анал бириистэрин ылла;
-«Уһун тыыннаах олоҥхоһут» анал аат Мира Егорова, Бөтүҥ, Амма улууһа уонна СР Олоҥхо Ассоциациятын анал бирииһэ, салайааччы: Февронья Васильевна Шишигина;
-«Кылыһах ырыалаах олоҥхоһут» анал аат Айта Васильева Аллараа Бэстээх, Мэҥэ-Хаҥалас улууһа, 1Тыыллыма нэһилиэгин участковай балыыһатын, салайааччы: Меркулова Ангелина Васильевна анал бирииһин ылла;
-«Түһүлгэлээх олоҥхоһут» анал аат Станислав Иванов, Майа, Мэҥэ-Хаҥалас улууһа «Альтернатива» ХЭТ салайааччы Прокопьев Константин Васильевич уонна «Армон» ХЭТ салайааччы: Михаил Васильевич Бродников анал бириистэрин ылла;
«Тэтими тутар олоҥхоһут» анал Марфа Аммосова, Дьанхаады, Мэҥэ-Хаҥалас уонна 1 Тыыллыма нэһилиэгин «Улуу Тоҕой» түмсүү, СР Олоҥхо Ассоциациятын анал бириистэрин ылла.
«Куйуур Олоҥхото-2024» күрэххэ:
3 добун сурук- Зинаида Бураева, Амма уонна Мэҥэ-Хаҥалас улууһун культураҕа уонна духуобунай сайдыыга методическай киин салайааччыта Галия Артемовна Герасимова уонна Олоҥхо Ассоцияцията туруорбут 15000 солк үптээх сертификаты тутта;
2 добун сурук -Арчыман Номоҕон, Ытык Күөл, Таатта уонна Олоҥхо Ассоциациятын 20000 үптээх сертификаты тутта;
1 добун сурук- Прасковья Лебедева, Покровскай куорат, Хаҥалас уонна Галина Семеновна Попова-Санаайа таруорбут үрүҥ көмүс бастыҥатын уонна Олоҥхо Ассоциациятын 25000 үптээх сертификаты тутта. Дьэ уонна республикатааҕы онус төгүлүн ыытыллыбыт «Куйуур олоҥхото-2024» ыччат олоҥхону толорооччулар түһүлгэлэригэр муҥутуур Кылаан Чыпчаал кыайыылаах аатын Дьокуускай куораттан Гаврил Менкяров ылыан ылла, киниэхэ «Монолит» тэрилтэ салайааччыта Захар Николаевич Яковлев 30000 уу харчынан ону таһынан Олоҥхо Ассоцияцията туруорбут 50000 солк үптээх сертификатынан наҕараадаланна. «Куйуур олоҥхото-2024» онус төгүлүн ыытыллар күрэх киэҥ далааһыннаахтык буолан ааста, бука бары кыттааччыларга, тэрийээччилэргэ барҕа махтал тыл буоллун!
Суруҋда📝 : Гавриил Колесов аатынан Олоҥхо Дьиэтин уус-уран салайааччыта Айта Васильева
🔸🔹🔸🔹🔸🔹🔸🔹🔸🔹🔸🔹🔸🔹🔸🔹🔸🔹🔸🔹🔸🔹
