Улуу Кыайыы күнүнэн!

Ыам ыйын 9 күнэ дойдубут хас биирдии олохтооҕор ураты суолталаах, дириҥ өйдөбүллээх.
Бу күн, Улуу Кыайыы 79 сылын бэлиэтии 1 Тыыллыма нэһилиэгин дьоно десант тэрийэн 1 Тыыллыма нэһилиэгин өрүстээҕи сириттэн билиҥҥинэн Ороссолуодаттан — Ворошилов аатынан колхозтан үлэни-хамнаһы өрө туппут 31 чулуу уолаттара «Күрүө Таастан» сэриигэ ыҥырыллан барбыттара. Бу уолаттарбыт сырдык кэриэстэригэр анаан айаннаан барбыт аартыктарыгар Мэҥэ Бэлиэ туруоруллубут сиригэр, Ороссолуода нэһилиэгин дьонун кытта көрсөн памятникка венок, сибэкки дьөрбөтүн уурдулар. Салҕыы Аллараа Бэстээххэ айаннаан Аҕа дойду сэриитин бастакы сылыгар геройдуу охтубут биир дойдулаахпыт Алексей Афанасьевич Ефремов памятнигар кэлэн үтүө аатыгар, хорсун быһыытыгар сүгүрү­йэн сибэкки дьөрбөтүн уурдулар.

Тыыл ветераныгар Ларионова Мария Николаевнаҕа, сэрии оҕолоругар Петрова Татьяна Семеновнаҕа, Григорьева Татьяна Семеновнаҕа, Егорова Раиса Захаровнаҕа, Тимофеева Маргарита Георгиевнаҕа, Назарова Раиса Степановнаҕа, Назаров Макар Макаровичка, Охлопкова Клара Петровнаҕа, Павлова Елена Николаевнаҕа, Сосин Константин Ильичка, Назарова Наталия Игнатьевнаҕа Военнай дьайыы кыттыылаахтарыгар Роббек Алексей Николаевичка, Архипов Илья Александровичка олохтоох дьаһалта Улуу кыайыы күнүнэн эҕэрдэлээн туран сэмэй бэлэхтэри туттардылар.

Биһиги Аҕа дойдуну көмүскээбит ытык дьоммут сырдык кэриэстэрин харыстаан, эдэр көлүөнэлэргэ иэдээннээх сэрии туһунан тиэрдэр туһуттан, ыччаты иитиигэ Кыайыы саллаатын Ийэ дойдуга таптала мэлдьи холобур буолуохтаах диэн Аркадий Михайлович Алексеев аатынан культура дьиэтин үлэһитэ Виталий Никифоров Аҕа дойду сэриитигэр өстөөх 8 тааҥкатын эстэрэн геройдуу охтубут Ефремов Алексей Афанасьевич сырдык кэриэһигэр туруорбут «Эн сырдык аатын умнуллубат»диэн испиктээкилэ сүрэхтэннэ! Бу күн Алексей Афанасьевич балта уонна кини бииргэ төрөөбүттэрин оҕолоро, сиэннэрэ  ону тэҥэ Мэҥэ-Хаҥалас улууһун культураҕа салалтатыттан Эмма Максимовна Павлова, Наталья Гаврильевна Пахомова, Станислав Александрович Иванов кэлэн кыттыыны ылан бардылар.
Улуу кыайыы күнүн памятниктарбытыгар сибэкки уонна свеча памяти ууран түмүктээтибит.
Испиктээкили «Дом культуры имени А.М.Алексеева» YouTube каналбытыгар көрүөххүтүн сөп.

Добавить комментарий

Ваш адрес email не будет опубликован. Обязательные поля помечены *