Дарханнар Дарханнара Михаил Михайлович Евсеев- Кураһаай Мэхээлэ 75 бэлиэ сааһыгар аналлаах «Куйаар уола Кураһаай түһүлгэтэ» республикатааҕы оһуохай күрэҕэ

Куйаар уола Кураһаай түһүлгэтигэр ситиһии Аам — даам тымныылаах ахсынньы ый 12-13 күннэригэр Дьокуускай куорат Арчы Дьиэтигэр СР култууратын туйгуна, «Норуот уус-уран айымньытыгар кылаатын иһин» бэлиэ хаһаайына Сунтаар улууһун уонна Түбэй нэһилиэгин ытык олохтооҕо, Саха Сирин Дархан оһуохайдьыта, Бүлүү бөлөх улуустарын Дарханнар Дарханнара Михаил Михайлович Евсеев- Кураһаай Мэхээлэ 75 бэлиэ сааһыгар аналлаах «Куйаар уола Кураһаай түһүлгэтэ» республикатааҕы оһуохай күрэҕэ ыытылынна. Икки күн тухары алаас ааттаахтара, улуус сурахтаахтара Сунтаар, Бүлүү, Ньурба, Үөһээ Бүлүү, Таатта, Чурапчы, Хаҥалас, Халыма, Нам, Мэҥэ Хаҥалас улуустарыттан уонна Дьокуускай куораттан бастыҥ оһуохайдьыттар мустан уран тылларын ууһун-уранын, кылыгырас кылыһахтарын маанытын , хоһуйар тылларын хомоҕойун иһитиннэрдилэр. Мэҥэ Хаҥалас улууһуттан барыта уон эдэр оһуохайдьыттара: 1 Наахараттан Дьулустан Михайлов, Дьанхаадыттан Татьяна Неустроева, Марфа Аммосова, Төҥүлүттэн Сибэкки Заровняева, Табаҕаттан Галина Зыкова, Рассолодаттан Айаал Аммосов, кынатчыт Роман Иванов, Аллараа Бэстээхтэн Айта Васильева уонна бастыҥ оһуохайдьыттарбыт, Дархан этээччилэрбит Виталий Никифоров, Денис Оконешников уонна Станислав Иванов Саха Сирин Дархан этээччилэрин кытары кытаанахтык киирсэн үрдүк ситиһиилэри ыллылар: Дьабыыл нэһилиэгиттэн СР Дархан этээччитэ Денис Оконешников анал аат ылан үрүҥ көмүс кур ылла; 1 Тыыллыма нэһилиэгиттэн СР Дархан этээччитэ Виталий Никифоров 2 үрдэл буолан 20.000 солк ылла; Майаттан СР Дархан этээччитэ Станислав Иванов 1 үрдэл буолан 25.000 солк ылла. Ааттаах суоллаах оһуохайдьыттары кытта атах тэпсэн улууспут албан аатын ааттатар уус-уран тыллаах, добун тойуктаах Дархан этээччи уолаттарбытыгар Денис Оконешниковка, Виталий Никифоровка, Станислав Ивановка истиҥ тыллаах эҕэрдэбитин этэбит!
Сырдатыыны суруйда Айта Васильева Гавриил Колесов аатынан Олоҥхо Дьиэтин уус-уран салайааччыта.

Добавить комментарий

Ваш адрес email не будет опубликован. Обязательные поля помечены *