Тохсунньу ый 29 күнүгэр улуустааҕы «Олук» уол оҕо түмсүүтэ кэлэн, күн бастакы аҥарыгар А.М.Алексеев аатынан култуура дьиэтигэр, күн иккис аҥарыгар С.З.Борисов аатынан Тыыллыма орто оскуолатыгар уол оҕону иитиигэ аһаҕас кэпсэтиилээх, күрэхтэһиилээх тэрээһини ыытта.
Тэрээһиҥҥэ кыттыыны ыллылар:
- Мэҥэ Хаҥалас улууһун баһылыгын маҥнайгы солбуйааччыта Михайлов Василий Васильевич
- Мэҥэ Хаҥалас улууһун үөрэҕириитин салалтатын начальнигы солбуйааччыта Петров Михаил Васильевич
- Инновационнай киин директора Титов Дмитрий Кириллович
- 1 Тыыллыма нэһилиэгин баһылыга Афанасьев Руслан Васильевич
- Ытык сүбэ бэрэссэдээтэлэ Игнатьев Зиновий Иванович
- Алгысчыт — Байаҕантай Кулан-Хаан Сэргэй уола
Зиновий Иванович Игнатьев тэрээһини алгыһынан арыйда. Айылҕаттан айдарыылаах таһыччы көрүүлээх Алгысчыт- Байаҕантай Кулан-Хаан Сэргэй уола төрөппүттэргэ, оскуола директордарыгар оҕону иитии, дьиэ кэргэн бигэ туруктаах буолуу, аҕа оруола уол оҕоҕо дьайыытын, чөл туруктаах буолуу, айылҕаны кытта ситим туһунан олус интириэһинэй кэпсэтиини тэрийдэ. Тэрээһиҥҥэ кэлбит хас биирдии үөрэнээччи кылгастык бэйэтин билиһиннэрдэ тэрийээччилэртэн сыл устата толорорго сыал — сорук туруорунарга, ону хайдах ситиһэргэ сөптөөх суолу тобуларга көмөлөөх «Сайдыы күннүгүн» туттулар. Олус интириэһинэй, туһалаах тэрээһин буолан ааста диэн бу күн кыттыылаахтара бэлиэтээтилэр.