I Тыыллыма нэһилиэгэр Дулҕалаах күөлүгэр саха төрүт дьарыгар куйуурдааһыҥҥа куйуур күрэҕэ буолан ааста. Маннык ураты балыктааһын көрүҥэ сахаларга эрэ баар. «Куйуур-2025»нэһилиэнньэни, эдэр ыччаты саха төрүт дьарыгар, куйуурдааһыҥҥа уонна балыктааһыҥҥа угуйуу, чөл олоххо сыһыары тардыы диэн сыаллаах-соруктаах ыытылынна. Түөрт нэһилиэкпит уолаттара, республикаҕа буолар куйуур күрэхтэрин хас да төгүллээх кыайыылаахтар Дьячковский Николай, Винокуров Леонид, Прокопьев Константин, Бочкарев Андрей биэстии киһилээх хамаанда туруоран күрэхтэстилэр .
Күрэхтэһии Аал Уот иччититтэн көрдөһүүттэн саҕаланна. Күрэхтэһии түөрт түһүмэхтэн турда: бириэмэҕэ куйуурдааһын, балык хатырыктааһын, чэй оргутуута, эстафета, тоҥуу хаарынан хамандыырдар сүүрэн тиийэн былаах көтөҕөллөр, дьэ оччоҕуна эрэ хамаандатын эр дьоно ойбону тэһэн саҕалыыллар.
Бастакы түһүмэх кэннэ культура дьиэтин үлэһиттэрэ ис миинин буһаран кэлбит дьону барыларын аһаттылар, иккис түһүмэх кэннэ тутатына сибиэһэй балык миинэ буһаран дьон астына амсайда.
Күрэх түмүгүнэн Дьячковскай Николай хамаандата бастакы миэстэни ылла, ккис миэстэни Винокуров Леонид хамаандата эрэллээхтик ылла, үһүс миэстэҕэ Прокопьев Константин эрчимнээх хамаандата тигистэ, Бочкарев Андрей хамаандата төрдүс миэстэҕэ таҕыста.
Сонун, сэргэх, өбүгэ үгэһин сөргүтэр күрэхтэһиигэ бириистэри туруордулар ООО «ЖКХ «Альтернатива»», ООО «Армон» тэрилтэлэрэ уонна А.М.Алексеев аатынан культура дьиэтэ .
Күрэхтэһии олус тыҥааһыннаахтык, өрө күүрүүлээхтик ааста. Кэлбит нэһилиэкпит дьоно дуоһуйан, астынан, сүргэлэрэ көтөҕүллэн тарҕастылар.