Бэс ыйын 7 күнүгэр I Тыыллыма нэһилиэгэр А.М.Алексеев аатынан култуура дьиэтигэр ДОЙДУМ ДЬОЛО-ДОЙДУМ ДЬОНО Тыыллыма ытык ымыы сирбит дьонун туһунан кинигэ сүрэхтэниитэ буолла.
Бу олус суолталаах, баай ис хоһоонноох кинигэни, нэһилиэкпит киэн туттар чулуу киһитэ, ССРС культуратын туйгуна, Саха Өрөспүүбүлүкэтин культуратын туйгуна, I Тыыллыма нэһилиэгин уонна Мэҥэ Хаҥалас оройуонун Бочуоттаах олохтооҕо, «Гражданскай килбиэн» «Мэҥэ аат» бэлиэлэрин хаһаайына, билигин бочуоттаах сынньалаҥҥа олорор Егорова Раиса Захаровна, уонна Саха Өрөспүүбүлүкэтин норуотун хаһаайыстыбатын үтүөлээх үлэһитэ, Максим Аммосов аатынан Государственнай бириэмийэ лауреата, Мэҥэ-Хаҥалас оройуонун, I Тыыллыма нэһилиэгин бочуоттаах олохтооҕо, Гражданскай килбиэн бэлиэ хаһаайына Афанасий Павлович Кириллин иккиэн олус үчүгэй кинигэни суруйан, бэчээттэтэн дьонноругар, нэһилиэк олохтоохторугар бэлэх ууннулар.
Кэлбит ыалдьыттары арыылаах алаадьынан күндүлээн көрүстүлэр, минньигэс астаах остуолларга олорон, истиҥник сэһэргэстилэр, кинигэ тула мустан санааларын, эҕэрдэ тылларын эттилэр. Тэрээһин нэһилиэк дьонун хорунан Тыыллыма өрөгөй ырыатынан арылынна, Александр Петрович Дайбанныыров «Манньыаттаах Уолугар» Николай Ребров анаабыт хоһоонун ааҕан иһитиннэрдэ, кинигэ ис тутулун ырытыы быыһыгар Тыыллыма нэһилиэгин, дьонун туһунан олус истиҥ хоһооннору иһиттибит: Иванна Ивановна Назарова «Абатын, аһыытын, Аһыкай» Наталья Харлампьева хоһоонун толордо, Марианна Семеновна Ларионова «Тыыллыма чулуу уола» бэйэтэ суруйбут хоһоонун толордо, Олга Андреевна Ларионова «Барда улуу киһибит» бэйэтэ суруйуутугар хоһооннору уонна Виктор Иннокентьевич Корякин бэйэтэ суруйбут Тыыллыма дьонун туһунан хоһоонун иһиттибит. Ыалдьыттарбытын нэһилиэк олохтоохторун кинигэ сүрэхтэниитинэн кэлэн ыалдьыт буолан эҕэрдэлээтэ улуус баһылыгын бастакы солбуйааччыта Михайлов Василий Васильевич. Э5эрдэ тылларын эттэ Саха Республикатын Ил Тумэн Депутата, Саха Сиринээ5и Наука киинин Генеральнай Директоры солбуйааччытыгар Тихон Николаевич Скрябин.
Биһиги төрөөбүт дойдубут Тыыллыма туһунан араас кэмнэргэ ырыаҕа ылланна, хоһооҥҥо хоһуйулунна, кинигэҕэ сурулуннулар, киинэлэр таҕыстылар, спектакллар турдулар, Мэҥэ Бэлиэлэр оҥоһулуннулар, түмэллэр үлэлииллэр.
Ол барыта олохторун сиэрдээхтик, туһалаахтык, ситиһиилээхтик олорбут, үлэлээбит-хамнаабыт биир дойдулаахтарбыт ыраас санааларыгар, сырдык мөссүөннэригэр ананар,
Олорон ааспыт сүдү дьоммут: бүттүүн норуокка даҕаны киэҥник биллэр-көстөр суоллаах-иистээх Г.В.Никифоров-Манньыаттаах Уола, Г.О.Петров -Халлааскы Уола, государственнай-политическай деятель С.З.Борисов, академик В.П.Ларионов уо.д.а. ааттар элбэҕи этэллэр.
Бу ДОЙДУМ ДЬОЛО — ДОЙДУМ ДЬОНО кинигэҕэ сурулуннулар сиэрдээхтик олорбут, айымньылаахтык үлэлээбит, дьон-сэргэ ытыктабылын ылбыт дьон.Ол иһигэр биһиги ортобутугар баар, сорохторо бочуоттаах сынньалаҥҥа олорор, атыттара айфар-тутар үлэ үөһүгэр сылдьар дьоммут-сэргэбит.
Дьэ бу курдук, нэһилиэкпитигэр өссө биир саҥа кинигэ күн сирин көрөн, олохтоохторго дьоһун бэлэх буолла.
