Алтынньы 9 күнүгэр биһиги нэһилиэкпитигэр биир бэлиэ күн буолла, гаас ситимигэр холбонуу үөрүүлээх тэрээһинэ ыытылынна. Бэлиэ күн Санкт-Петербург куоракка тэриллибит норуоттар икки ардыларынааҕы күөх төлөн форумун чэрчитинэн быһа эфирга холбонон, «Газпром» аахсыйалаах уопсастыба бырабылыанньатын бэрэссэдээтэлэ Алексей Борисович Миллер күөх төлөн киириитин үөрүүлээх быһыыга арыйбыта ураты түгэнинэн буолла, бу күн куйаар ситимин нөҥүө биир кэмҥэ Россия 25 регионугар күөх төлөн уота күлүмнүү умайда.
Нэһилиэкпит олохтоохторун бу бэлиэ күнүнэн улуус баһылыга Дмитрий Тихонов, «Сахатранснефтегаз» АУо хампаанньа гааһы тарҕатар ситимин салайааччыта Антон Томскай, промышленность уонна геология миниистирин солбуйааччы Михаил Кириллин, «Сахатранснефтегаз» АУо хампаанньа генеральнай дириэктэрин солбуйааччы Александр Шванов эҕэрдэлээтилэр.
Саха эстрадатын ураты суолун хаалларбыт, өлбөт үйэлээх ырыалары айбыт Мэҥэ-Хаҥалас мелодистарын ааттатар үйэтитэр «Мэҥэ Хит» айар холбоһук алыптаах ырыаларын нэһилиэкпит дьонугар бэлэхтээтилэр.
Эрдэттэн нэһилиэк тэрилтэлэрэ, түмсүүлэрэ, улууспут салалталара, Олоҥхо дьиэтин үлэһиттэрэ бары бииргэ бэлэмнэниигэ көмөлөөн үлэлээммит тэрээһиммит үрдүк таһымҥа ааста, барыгытыгар улахан МАХТАЛБЫТЫН биллэрэбит.
