Муҥха — саха норуотун өбүгэ саҕаттан илдьэ кэлбит үтүө үгэһэ буолар ол курдук
Сэтинньи ый 8 күнүгэр Дулҕалаах күөлүгэр нэһилиэкпит муҥхата буолан ааста. Сарсыарда күөлгэ тиийээт муҥхаҕа киириэх иннинэ үгэс быһыытынан уот оттон арыылаах алаадьынан күндүлээн, көрдөһөн баран эр дьон бары күөлгэ киирэн икки муҥханы түһэрдилэр. Бу кыһыҥҥы бырааһынньыкка сүүстэн тахса киһи муһунна.
Эбиэккэ дылы сүүстэн тахса куул балыгы ыллылар. Эбиэккэ кутаа уотугар буспут минньигэс ис уонна эт миин буһаран, сылаас чээй өрүнэн кэлбит дьону барыларын култуура дьиэтин кыргыттара күндүлээтилэр, нэһилиэкпит олохтоохторугар муҥхаҕа буһарын диэн эт бэрсибит дьоммутугар улахан махталбытын тиэрдэбит.
Эбиэт кэннэ Дулҕалаах арҕаа өттүгэр биир илими түһэрэн бу күҥҥэ уопсайа 220 куул балыгы ыллыбыт. Өрүүтүн буоларын курдук биһи дьоммут көрөн турбакка, бары үлэҕэ көхтөөхтүк кыттан мунха үлэтэ уһаабакка, тардыллыбакка бүтэн оһон истэ. Балык таһыытыгар бэйэтин бортовой массыынатынан сүүрбүт Егоров Игорь Константиновичка, тиэйиигэ, таһыыга үлэлээбит уолаттарга махтал тылларын этэбит. Муҥхаҕа кэлбит дьон бары биирдии куул балыктаах үөрэн тарҕастылар.
Байанай бэрсибититтэн эр дьоммут соҕотох кырдьаҕастарга, байыаннай дьайыыга сылдьар байыастар төрөппүттэригэр өлүүлээн бэристилэр.
Ыҥырыыбытын ылынан улахан, үчүгэй мунхатын уонна хамаандатын илдьэ кэлэн көмөлөспүтүтэр улуустааҕы олох- дьаһах коммунальнай хаһаайыстыбатын директорыгар Яковлев Иннокентий Эдуардовичка Тыыллыма олохтоохторун ааттарыттан махталбытын биллэрэбит
Күөх Боллох көмүс хатырыктааҕыттан күндүлээн дьонун-сэргэтин үөртэ.
