Сэтинньи ый 21 күнүгэр Балыктаах нэһилиэгин култууратын дьиэтигэр “Мындыр саас” бырайыак чэрчитинэн “биһиги Сойууска төрөөбүт дьоллоохпут!” диэн девизтаах Мэҥэ Хаҥалас улууһун аҕам саастаахтарын XII төгүлүн ыытыллар “Сулустаах эстэпиэтэ” түрдүк таһымҥа буолан ааста. Кэлбит ыалдьыттары Мэҥэ нэһилиэгин олохтоохторо саха сиэринэн арыылаах алаадьынан көрүстүлэр. Бэстибээл үөрүүлээх аһыллыытыгар кэлбит ыалдьыттарга эҕэрдэ тылын эттэ Мэҥэ нэһилиэгин баһылыга Нуьргун Владимирович Габышев. Бэйэтин эҕэрдэтин, дьүүллүүр сүбэни билиһиннэрдэ Мэҥэ Хаҥалас улууһун аҕам саастаахтарын сэбиэтин бэрэссэдээтэлэ Евдокия Саввична Решетникова, ол курдук дьүүллүүр сүбэҕэ үлэлээтилэр: Шарина Зоя Васильевна – дьүүллүүр сүбэ бэрэссэдээтэлэ, СР култууратын туйгуна, улуустааҕы култуура бэтэрээннэрин сүбэтин салайааччыта; Скрябина Татьяна Николаевна – СР социальнай сулууспатын үтүөлээх үлэһитэ, улуустааҕы бэтэрээн сэбиэтин бэрэссэдээтэлин солбуйааччыта; Федоров Улмас Егорович – улуустааҕы култуура уонна духуобунай сайдыы салалтатын методиһа.
Бу күн «Сулустаах эстэпиэтэ» 7 ирдэнэр нүөмэрдээх концертнай программаларынан кыттыыны ыллылар «Мэҥэ нэһилиэгэ», «Дьабыыл», «Мөҥүрүөн», «Ходоро», «1-кы Тыыллыма», «1 -кы Баатара», «2-с Наахара» нэһилиэктэр.
Биһиги 1 Тыыллымабыт нэһилиэгин ветераннарын кэнсиэригэр туруоруллубут 7 нүөмэрдэрэ барыта Лауреат үрдүк аатын ылан, кыттаачыларбыт бары үөрэн-көтөн, астынан кэллилэр. 
