Сэтинньи ый 29 күнүгэр А.М.Алексеев аатынан култуура дьиэтигэр Байанай ый чэрчитинэн «Идэһэ, иис түһүлгэтэ — 2025» буолан ааста.
Сахалыы халандаарынан сэтинньи ый – Байанай ыйа, ас-үөл ыйа, уруу ыйа уонна дьолуо тардар ый.Үгэс эргииринэн биһиги бу ыйы сыл аайы сахалыы сиэрин ситэрэн, туомун толорон ыытыахтаахпыт.
Баай Барыылаах Байанай ыйыгар өбүгэлэрбит Байанайы олордуу, дьолуо тардыы туомнарын, саха аһын күнүн анаан ыыталлар эбит уонна бу ыйга анаан ыал ийэтин, кыыс оҕону болҕойоллор эбит. Ол сиэри тутуһан биһиги нэһилиэкпитигэр бү тэрээһини ыыттыбыт.
Бу күн кэлбит дьон бары чуорааны тыаhатан киирэн Алгыс ыллылар. Сэтинньи ый сиэрин-туомун, Алгыс ылыытын С.З.Борисов аатынан Тыыллыма орто оскуолатын Саха тылын учуутала Аргунова Марианна Петровна толордо.
Алгыс кэннэ түөрт кырыылыы быhыллыбыт сыаны (хаhаны) кэлбит нэһилиэкпит олохтоохторо бары Дьолуо тигистилэр. Дьолуо Байанайы ытыктааhынныын, аска-үөлгэ сыhыанныын уонна кэскили кытта ыкса сибээстээх эбит. Дьолуо диэн туох эмэ үөрүүгэ эмискэ тиксии эбит. Дьолуону тардар туом сэтинньи ыйга оҥоhуллар. Ол туом — түөрт кырыылыы быhыллыбыт сыаны (хаhаны) сиэhин, бүлүүhэҕэ баар хаhаттан ылан үөhэ дук гынан уунуллар уонна «Айхал» диэн баран сиэниллэр
Байанай Аар тайҕа баһылыга, булт иччитэ. Уол оҕо айылҕаттан булка-балыкка тардыстар айдарыылаах. Кинини кыра эрдэҕиттэн тыаҕа илдьэ сырыттахха, өбүгэлэрбит үгэстэрин, булт сиэрин-туомун, бултуур тэриллэри үөрэттэххэ үтүө булчут, балыксыт буола улаатар ол курдук нэһилиэкпит олохтооҕо булчут, балыксыт Валентин Дмитриевич Борисов оскуола оҕолоругар саа араастарын көрдөрдө кэпсээтэ, илдьэ сылдьарга сэрэхтээх буолууну билиһиннэрдэ.
Музейбыт үлэһитэ Петр Петрович Алексеев өбүгэлэрбит бултуур тэриллэрин көрдөрдө, билиһиннэрдэ
Оскуола оҕолорун хамаандаҕа арааран кулууп үлэһиттэрэ Леонид Дмитриевич уонна Петр Петрович күрэхтэһиннэрдилэр, оонньоттулар
атыы-тутуу дьаарбаҥкатыгар нэһилиэк олохтоохторо араас астары табаардары аҕалан атыылаатылар
Ону тэҥэ нэһилиэкпит уран тарбахтаахтара «Тыыллымаана» түмсүү кыттыылаахтара Прокопьева Мария Васильевна, Ларионова Марианна Семеновна, Яковльева Елена Спиридоновна кыбытыктаах тигиигэ, быысапкаҕа, кылынан валянияҕа маастар кылаастары биэрдилэр, выкройка оҥорууга, оҕуруонан харыйа киэргэлин оҥорууга Черкашина Вероника Владимировна, Никифорова Юлия Григорьевна маастар кылаастары ыыттылар.
