Сэтинньи ый 25 күнүгэр Сахабыт Сиригэр Уруйдаах Улуу Олоҥхо күнүгэр Саха Өрөспүүбүлүкэтин бырабыытылыстыбатын дьиэтигэр үөрүүлээх быһыыга майгыга үгэс буолбут Ил Дархан стипендиятын олоҥхоһуттарга, оһуохайдьыттарга, норуот маастардарыгар уонна тимир уустарыгар туттарыы дьоро тэрээһинэ ыытылынна. СӨ Ил Дархана Айсен Сергеевич Николаев Олоҥхо күнүнэн үөрэн-көтөн туран эҕэрдэлээтэ, Олоҥхо үһүс уон сыллаах эргиирин салҕыырҕа илии баттаата уонна Олоҥхо Дьиэлэригэр 2026 сылга субсидия бэриллэрин туһунан үөрүүлээх солуну иһитиннэрдэ. Бу кэннэ дьоһун түһүлгэҕэ СӨ бырабыытылыстыбатын бастакы солбуйааччыта Сергей Местников олоҥхоһуттарга, оһуохайдьыттарга, норуот маастардарыгар уонна тимир уустарыгар туоһу суругу туттарда. Мэҥэ Хаҥалас улууһуттан олоҥхону толорооччу, Гавриил Колесов аатынан бириэмийэ хаһаайына, СӨ култууратын туйгуна , 1 Тыыллыма нэһилиэгин Аркадий Алексеев аатынан култуура дьиэтин уус уран салайааччыта Виталий Никифоров уонна Төҥүлүттэн СӨ норуотун маастара, мас, тимир ууһа Елисей Баишев-Дэлэй Уус ыллылар. Бу дьоһун наҕараадаҕа тиксибит уолаттарбытын Виталий Никифоровы, Елисей Баишевы үрдүк ситиһиигитинэн итиитик-истиҥник эҕэрдэлиибит! Айар талааҥҥыт аартыктара арыллан, айымньылаахтык үлэлээн-хамсааҥ, айыҥ-тутуҥ, дьоһун мааны олохтонуҥ диэн алгыс тылбытын аныыбыт!
https://t.me/olonkho1/2384
Айта Васильева Гавриил Колесов аатынан Олоҥхо Дьиэтин салайааччыта
